Vite me radhë, sikurse banorët e Tetovës, edhe banorët e Komunës së Gostivarit përballen me mungesën e vendparkimeve. Krahas mungesës së vendeve adekuate për parkim, po ashtu problem në vete paraqet edhe parkimi vend e pa vend i automjeteve. Këto dy qytete të Pollogut vazhdimisht kanë probleme të kësaj natyre, ku edhe premtohen investime për të zgjidhur kaosin lidhur me parkimin. Kryetari i Komunës së Gostivarit, Arben Taravari, ka paralajmëruar së fundmi se këtë vit do të fillojë ndërtimi i parkingjeve në kate. Sipas tij, tre të tilla do të ndërtohen në territorin e qytetit të Gostivarit.

“Mund të informoj se këtë vit, në pranverë do të fillojnë punimet për ndërtimin e tre parkingjeve në kate”, ka thënë shkurt Taravari. Edhe kryetari i Komunës së Tetovës, Bilall Kasami, ka paralajmëruar se në Tetovë do të ndërtohen parkingje në kate për të zbutur kaosin në rrugët e Tetovës. Në ndërkohë, po ashtu këto dy qytete përballen me problemin e qenve endacak. Në Gostivar janë dy qendra për trajtimin e tyre. Për njërën prej tyre ka vërejtje nga ana e Inspektoratit të Veterinarisë, sepse duhen të plotësohen disa kushte. Lidhur me problemin me qentë endacak, kryetari i Gostivarit, Arben Taravari, thekson se janë funksionale të dy qendrat.

“Ne premtuam dhe i realizuam dy Qendra për trajtimin e qenve endacak. Të dyja janë funksionale, por për njërën kemi vërejtje që i kërkon Qendra për Veterinari në Maqedoninë e Veriut, kushte që vështirë të plotësohen. Të dy qendrat janë ndërtuar nga Komuna e Gostivarit, tek njëra kemi patur ndihmë edhe nga ana e UNDP-së. Unë them se kushtet që kërkohen nga ana e Inspektoratit të veterinarisë nuk mund t’i plotësojë asnjë qendër, sepse janë kushte tepër të vështira. Ne kemi funksionuar me dy qendra gjatë tre viteve të fundit dhe ndër akuzat në fushatë ishte pikërisht problemi me qentë endacak. Është e vërtetë se ka qen endacak, por janë trajtuar shumë prej tyre, ndoshta mbi 700”,tha Taravari.

Kryetari i Gostivarit po ashtu ka nënvizuar edhe zgjidhjen në nivel të komunave të Pollogut për këtë problem. “Tash është ideja që në rajon të Pollogut, së bashku me Komunën e Tetovës dhe komunat tjera të Pollogut dhe ne e kemi diskutuar dhe e kemi vendosur si projekt urgjent të ardhshëm Qendrën rajonale për strehimin e qenve endacak”, tregon Taravari. Problemi me qentë endacak dhe parkingjet në kate në Tetovë dhe Gostivar, vite me radhë është i pazgjidhshëm. Këto dy problem, sfidojnë vazhdimisht pushtetet lokale në këtë rajon dhe jo vetëm. (koha.mk)